<慢煮牛柳、炸蓮藕片、青豆蓉配焗新薯>

Sous Vide Tenderloin, deep fried Lotus Root and Pea Puree 用慢煮方式煮牛柳，可以準確地控制牛柳內部達至半生熟的程度。再用大火煎烤一下表面，變成脆面，美味再提昇。今次用了自家製的 Demi-Glace 牛肉燴醬做汁，味道配合得天衣無縫。再加上香脆的炸蓮藕片，口感多元化，增加不少進食的趣味。

1

準備所有材料

2

牛柳條先用繩紮好，灑上鹽和黑胡椒調味。

3

牛柳下鑊用橄欖油、百里香、迷迭香和少許牛油，煎香四面，鎖住肉汁。每面煎一分鐘。取出放涼。然後放入真空袋，抽真空。

4

牛柳用六十度水溫，慢煮九十分鐘。

5

青豆放入焗爐，100度焗九十分鐘，直至乾身。然後磨成粉末。備用。

6

新薯在鹽水中煮十分鐘。取出。中間挖出一個小孔。放入焗盤，抹上橄欖油，180度焗二十分鐘。

7

青豆用鹽水煮三到五分鐘至煮熟。取出，立即放入攪拌機，加少許煮豆水，牛油，淡忌廉。攪成豆蓉備用。

8

蓮藕切片，印乾水份。上少許麵粉，放入180油炸一分鐘。取出。灑上少許鹽調味。

9

新薯焗二十分鐘後，加上巴馬臣芝士碎，再焗十分鐘。

10

牛柳從慢煮中取出，再下鑊用橄欖油、百里香、迷迭香和少許牛油，把表面煎脆。每面煎一分鐘。取出休息五分鐘。

11

用回煎牛柳的鑊，倒走大部份油。加少許紅酒 deglaze 隻鑊，幫助鑊底的肉屑脫離。然後加入一片 demi glace，煮至收汁。

12

接著可以上碟，先抹上綠豆蓉。四周灑上綠豆粉末。放上牛柳、焗薯、炸蓮藕片。最後倒上醬汁。完成。

小貼士

今次用了自家製的 Demi-Glace 牛肉燴醬做汁，味道配合得天衣無縫。

資料來源: mygroovykitchen

<慢煮香草三文魚配希臘乳酪醬>

慢煮既三文魚真係好滑好嫩…
我都係第一次試呢種質感，比新鮮刺身口感更好!!!
而且最後用火槍灸燒魚皮部分，微焦既香氣，
配埋希臘乳酪醬，Wow~ !!!!

1

先檢查三文魚仲有冇骨/鱗未清除，再用廚房紙抹乾淨

2

順次序將海鹽，黑胡椒碎，橄欖油及檸檬汁均勻塗抹三文魚

3

放上刁草及檸檬片，用真空機密封三文魚並放入雪櫃醃1小時

4

將slow cooking tower 放入水中，調較溫度至49度 , 當水達到溫度後， 放入整袋三文魚，並用夾夾實，調較時間慢煮25分鐘

5

呢個時侯，可預備希臘乳酪醬，將原味希臘乳酪加入切碎的羅勒葉及黑胡椒碎拌勻即可

6

完成後，小心取出三文魚，取走刁草及檸檬片, 反轉三文魚 (魚皮向上)，放上已鋪鍚紙的焗盤，利用火槍炙燒三文魚的魚皮至微焦, 完成啦!!

<鮮茄磨菇意粉配慢煮雞胸>

經常都有人問我點解減肥可以撈汁, 同埋個汁係點煮, 其實都係萬變不離其宗咁用新鮮蕃茄同洋蔥+減糖茄汁煮出黎, 係合法的汁黎架, 呢個汁可以配豬牛雞, 意粉飯
當然你仲可以加其他啱味既蔬菜, 例如青椒甘筍等等等令個汁味道更豐富啦

1

雞胸肉先用醃料醃1小時, 之後用慢煮棒65度煮2小時

2

意粉跟包裝指示減1分鐘, 煮熟瀝乾水備用

3

磨菇切片, 洋蔥切絲, 蒜頭刴成蒜蓉, 蕃茄切細粒

4

用2茶匙油炒香蒜蓉

5

加入洋蔥炒到軟身

6

加入蕃茄炒至軟身

7

加入磨菇炒至出水

8

加入2湯匙減糖茄汁調味後, 蓋上煲蓋用小火煮15-20分鐘

9

就會得到合法的汁喇~

10

意粉回鑊拌勻, 食得!!